नेपाली काँग्रेसका संस्थापक नेता एवं आधुनिक नेपालका परिकल्पनाकार महामानव विश्वेश्वरप्रसाद कोइरालाको ४१ औं स्मृति दिवस विविध रचनात्मक कार्यक्रमका साथ झापाका १५ वटै पालिकामा मनाइने भएको छ ।
नेपाली काँग्रेस झापाका पदाधिकारी, क्षेत्रीय सभापति, प्रदेश क्षेत्रीय सभापति, गाउँ÷नगर सभापतिहरूको संयुक्त बैठकले गाउँ÷नगर पालिका तहमा रक्तदान, बृक्षरोपण, बिचार गोष्ठी लगायतका विविध रचनात्मक कार्यक्रम गरी विश्वेश्वरप्रसाद कोइरालाको स्मृति दिवस मनाउने निर्णय गरेको हो ।
नेपाली काँग्रेस झापाका सभापति देउकुमार थेबेको सभापतित्वमा सम्पन्न बैठकले उक्त कार्यक्रम भव्य र सभ्य रुपमा सम्पन्न गर्न गाउँ÷नगर पालिकामा जिल्ला प्रतिनिधि समेत तय गरेको सचिव कृष्ण हुमागाईँले जानकारी दिए ।
बैठकले झापाको चन्द्रगढीस्थित बिपीको सालिकमा बिहान ८ बजे माल्यार्पणसहित कोणसभा राख्ने निर्णय गरेको सचिव नवीन विमलीले जानकारी दिए ।
यसैबीच बैठकले मेचीनगरमा राम कट्टेल, बुद्धशान्तिमा राजकुमार बराइली, अर्जुनधारामा केशवराज पाण्डे, बिर्तामोडमा सुधीरकुमार सिवाकोटी, कचनकबलमा कालेन्द्रप्रसाद सिंह राजवंशी, भद्रपुरमा नवीन विमली र गणेश पोखरेल, हल्दिबारीमा भूमिराज राई, बाह्रदशीमा हुकुमसिंह राई र भूमिप्रसाद राजवंशीलाई जिल्ला प्रतिनिधि तय गरेको कार्यालय सचिव जयकुमार दाहालले जानकारी दिए ।
यसैगरी कनकाइमा जिल्ला सभापति देउकुमार थेबे र किरण भट्टराई, झापामा कमल भण्डारी, शिवसतासीमा जयनारायण शाह, कमलमा फूलवती राजवंशी, गौरादहमा ढुण्डि भण्डारी र चन्द्रा खड्का भट्टराई, दमकमा शेरबहादुर भट्टराई, गौरीगञ्जमा रेगिना भट्टराई प्रसाईँ र प्रकाश कार्कीलाई जिल्ला प्रतिनिधि तय गरेको बताइएको छ ।
प्रजातान्त्रिक आन्दोलनका अग्रणी योद्धा एवं प्रजातान्त्रिक÷समाजवादी विचारधाराका प्रवर्तक विश्वेश्वरप्रसाद कोइरालाको २०३९ साल साउन ६ गते निधन भएको थियो । उनको जन्म विसं. १९७१ भाद्र २४ गते भएको थियो ।
नेपालका प्रथम जननिर्वाचित प्रधानमन्त्री बन्नुभएका कोइरालाको राजनीतिक जीवन भारतमा चलिरहेको ‘भारतको स्वतन्त्रता आन्दोलनबाट सुरु भएको थियो ।
वि।सं १९८८ मा बनारसबाट उच्च माध्यमिक शिक्षा पूरा गरेका कोइरालाले बनारस हिन्दु विश्वविद्यालयबाट राजनीति तथा अर्थशास्त्र विषयमा स्नातक तथा कलकत्ता विश्वविद्यालयबाट कानुनमा स्नातकोत्तर तहसम्मको अध्ययन गरेका थिए । विद्यार्थी जीवनदेखि नै प्रजातान्त्रिक आन्दोलनमा सक्रिय उनले लामो समयसम्म जेल–नेल र निर्वासनसम्मको कठोर यातना भोगेका थिए । २००३ मा उनले स्थापना गरेको नेपाली राष्ट्रिय काँग्रेस पार्टी पछि गएर नेपाली काँग्रेस बनेको हो ।
नेपाली साहित्यमा बिपी कोइरालाका नामले स्थापित उनका मनोवैज्ञानिक कथा, उपन्यास लगायतका थुप्रै कृति प्रकाशित छन् । मनोवैज्ञानिक साहित्यिक रचनामार्फत पनि उनले सामाजिक रूपान्तरण, मानव स्वतन्त्रता र परिवर्तनको पक्षमा सशक्त विचार प्रवाह गरेका छन् ।