बिर्तामोड । सीमान्तकृत लैङ्गिक तथा यौनिक अल्पसङ्ख्यक (तेस्रो लिङ्गी तथा समलिङ्गी) समुदायका नागरिकले आफ्ना ११ बुँदे माग सम्बोधनका लागि सरकार तथा राजनीतिक दलको ध्यानाकर्षण गराएका छन् ।

यस्ता छन् ११ बुँदे माग

१) सीमान्तकृत लैङ्गिक तथा यौनिक अल्पसङ्ख्यक समुदायमाथि हुने सबै खाले विभेद अन्त्य गरी महिला, पुरुषसरह सम्मानजनक रुपमा बाँच्न पाउने संवैधानिक अधिकार व्यवहारमा सुनिश्चित गरियोस् । लुकेर बसेका सीमान्तकृत लैङ्गिक तथा यौनिक अल्पसङ्ख्यकलाई आफ्नो अस्तित्व र पहिचान दिलाएर स्वतन्त्र जीवन जिउन सक्ने वातावरण सिर्जना गरियोस् ।

२) सीमान्तकृत लैङ्गिक तथा यौनिक अल्पसङ्ख्यकहरूका लागि सरकारी निकाय, निजी क्षेत्र तथा राजनीतिक लगायत सबै क्षेत्रमा आरक्षणको व्यवस्था गरियोस् ।

३) हरेक राजनीतिक दलका सबै तहका समिति र आसन्न तीनै तहको निर्वाचनमा सीमान्तकृत लैङ्गिक तथा यौनिक अल्पसङ्ख्यक समुदायको प्रतिनिधित्व सुनिश्चित गरियोस् ।

४) ०६४ पुस ६ गते सर्वोच्च अदालतले  पहिचानको आधारमा सीमान्तकृत लैङ्गिक तथा यौनिक अल्पसङ्ख्यकलाई नागरिकता दिनू भनी आदेश गरे पनि उक्त आदेश कार्यान्वयन नभएको र विभिन्न झन्झट दिइँदै आएकाले तत्काल कार्यान्वयन गरी नागरिकता दिने कार्यमा सहजता ल्याइयोस् ।

५) सीमान्तकृत लैङ्गिक तथा यौनिक अल्पसङ्ख्यक समुदायका व्यक्तिलाई जीवन निर्वाहका लागि तीनै तहका सरकारबाट स्वरोजगारीमूलक कार्यक्रमका साथै उचित अवसर प्रदान गरियोस् । जीवन निर्वाहमा समस्या भएकाहरूलाई मासिक भत्ताको व्यवस्था गरियोस् ।

६) विद्यालयमा हुने विभेद र अपमान अन्त्य गरी अन्य विद्यार्थीसरह सम्मानजनक रुपमा पठन पाठनका लागि व्यवस्था गरियोस् । सीमान्तकृत लैङ्गिक तथा यौनिक अल्पसङ्ख्यक समुदायका बालबालिकालाई निःशुल्क समान शिक्षा पाउने व्यवस्था गरियोस् । शिक्षाको पाठ्यक्रम, सबै खाले विद्यालयको भौतिक संरचना जस्तै: कक्षा कोठा, शौचालय लगायतका पूर्वाधारहरू पनि सीमान्तकृत लैङ्गिक तथा यौनिक अल्पसङ्ख्यक समुदाय मैत्री बनाइयोस् ।

७) नेपाल सरकार स्वास्थ्य बिमा बोर्डबाट गरिँदै आएको स्वास्थ्य बिमा कार्यक्रमबाट सीमान्तकृत लैङ्गिक तथा यौनिक अल्पसङ्ख्यक समुदायका नागरिक वञ्चित रहँदै आएकोले तत्काल स्वास्थ्य बिमा कार्यक्रममा समावेश गर्ने व्यवस्था गरियोस् ।

८) अरू देशमा झैँ नेपालमा पनि समलिङ्गी विवाहलाई कानुनी मान्यता दिने व्यवस्था गरियोस् ।

९)सीमान्तकृत लैङ्गिक तथा यौनिक अल्पसङ्ख्यक समुदायका नागरिकलाई अस्पतालहरू तथा सबै क्षेत्रमा सहज र सम्मानजनक रुपमा सेवा लिने वातावरण सिर्जना गरियोस् ।

१०) परिवार र समाजको साथ नपाएका तथा सहाराविहीन सीमान्तकृत लैङ्गिक तथा यौनिक अल्पसङ्ख्यकलाई स्वतन्त्र पूर्वक बाँच्नका लागि छुट्टै आश्रमको व्यवस्था गरियोस् ।

११) सार्वजनिक स्थल र सार्वजनिक सरोकारका कार्यालयहरूमा महिला, पुरुष झैँ सीमान्तकृत लैङ्गिक तथा यौनिक अल्पसङ्ख्यकको लागि पनि शौचालयको व्यवस्था गरियोस् ।