सोलुखुम्बु। सोलुखुम्बुको पत्तालेको मूल सडकमा क्रेनले ३३ केभीको विद्युत् लाइन छुँदा करेन्ट लागेर क्रेनमा सवार दुई जनाको घटनास्थलमा नै मृत्यु भएको छ ।

सोलुदूधकुण्ड नगरपालिका ८ पत्तालेको सेतो माने नजिकै लोबेड गाडी ट्रकमा सवार क्रेनले शुक्रवार बिहान साढे ८ बजे ३३ केभिए प्रसारण लाइनमा छुँदा सवार चार जना युवामध्ये घटनास्थलमै दुई जनाको मुत्यू भएको हो भने अन्य दुई जना घाइते भएका छन्  । 

मृत्यु हुनेमा लोबेड गाडी चालक बागलुङका २६ वर्षीय भूमिराज मरासिनि र क्रेन चालक स्याङ्जाका २४ वर्षीय राम परियार छन् । ग १ ज ५१७३ नम्बरको उक्त गाडीमा सवार अन्य दुई जना घाइते भएको र घाइतेको उपचारका लागि अस्पताल पठाइएको जिल्ला प्रहरी कार्यालय सोलुखुम्बुका प्रहरी नायब उपरीक्षक कवित कटुवालले जानकारी दिए ।

विगत केही वर्षयता निर्माणाधीन अवस्थामा रहेको ८६ मेगावाट क्षमताको सोलुखोला दूधकोशी जलविद्युत आयोजनाको क्रेन मर्मत सम्भारका लागि लोबेड गाडीमा पोखरा लैजाने क्रममा हाई टेन्सन लाइनमा छुँदा दुर्घटना भएको हो ।

करेन्टका कारण गाडीमा आगो लागेको प्रहरीले जनाएको छ । हाई टेन्सनको तार होचो भएका कारण क्रेनले छुन पुग्दा घटना भएको हो । घटना सम्बन्धमा थप अनुसन्धान भइरहेको प्रदेश प्रहरी कार्यालय विराटनगरले जनाएको छ ।